Don oahpat
- fysihkalaš doaimmaid ja hárjehallama birra
- hárjehallama jođiheami birra
- dearvvašvuođa, borramušválljema ja goruda ráhkadusa birra
- teorehtalaš fágaid
Don berret
- beroštit dearvvašvuođas ja fysihkalaš doaimmain
- liikot hárjehallat juohke beaivve, skuvlaáiggis ja dan maŋŋá
- leat čeahppi ovtta dahje máŋgga valáštallamis
Eanemustá bealli Jo1 ohppiin sáhttet váldojuvvot ohppui sisabeassangeahččaleami dahje duođaštuvvon dáidduid bokte.
Don olahat
- studerengelbbolašvuođa ja sáhtát váldit alit oahpu
Jos válddát alit oahpu, sáhtát earret eará šaddat
- fysioterapevtan, valáštallanpsykologan dahje persovnnalaš hárjeheaddjin
- oahpaheaddjin, valáštallankonsuleantan dahje neavvun, gii rávve fysihkalaš doaimmaid ja dearvvašvuođa hárrái
- jođiheaddjin luondduvuđot olgodoaimmain ja turismmas
- politiijan, befálan dahje offisearan
Soaittát maid studeret eará fidnui – go dus lea oppalaš studerengelbbolašvuohta, de sáhtát ohcat eanaš allaskuvllaid ja universiteahtaid oahpuide
Bargosadjin soaitá leat
- skuvla
- hárjehallanguovddáš dahje valáštallanorganisašuvdna
- dálkkodanásahus
- militeara ja politiija
Alit ohppui beassama gáibádusat
Oppalaš studerengelbbolašvuođain sáhtát ohcat eanaš allaskuvllaid ja universiteahtaid oahpuide. Muhtun oahpuide leat erenoamáš ohppuibeassangáibádusat:
- Sisabeassangeahččaleamit: Suodjalusas ja politiijaallaskuvllas leat fysihkalaš unnimusgáibádusat. Go válddát valáštallanfágaid, de oaččut buori vuođu čađahit fysihkalaš iskosiid.
- Reálafágagáibádus: Muhtin oahpuide gáibiduvvojit dihto reálafágat, ovdamearkka dihte inšenevra-, reálafága- ja medisiinna ohppui. Don gávnnat ohppuibeassangáibádusaid neahttasiiddus samordnaopptak.no. Valáštallanfágain it soaitte čágahit diibmoplánii buot dárbbašlaš reálafágaid. Dárkkis skuvllainat fálletgo doppe reálafágaid, maid áiggošit váldit.
Fágaid válljen valáštallanfágaid oahppoprográmmas
- Sáhtát ieš válljet golbma prográmmafága, ovtta Jo1:s, ovtta Jo2:s ja ovtta Jo3:s.
- Prográmmafágain, maid válljet, sáhtát čiekŋut valáštallanfágaide ja/dahje fágaide, mat gullet studeremii ráhkkanahtti oahppoprográmma eará prográmmasurggiide (ovdamearkka dihte reálafága dahje vierisgiella).
- Du skuvla dat mearrida guđe prográmmafágaid dat fállá.
- Itgo lohkan vierisgiela nuoraidceahkis? Dalle fertet válljet vierisgiela oktasašfágan Jo3:s, itge de beasa válljet prográmmafága Jo3:s.
- Leatgo dus erenoamáš jurdagat boahtteáiggi hárrái? Dárkkis mii gáibiduvvo daid oahpuide, maidda dus lea beroštupmi, ovdalgo válljet fágaid.
- Vierisgiela ja reálafága prográmmafágain oažžu lassičuoggáid go ohcá alit ohppui.
