Dus lea vuoigatvuohta oažžut iežat reálagelbbolašvuođa árvvoštallojuvvot, go ozat joatkkaoahpahussii, ja dus lea rávesolbmuid vuoigatvuohta. Reálagelbbolašvuohta lea gelbbolašvuohta, maid don leat čohkken formála oahpuin ja bargoeallimis ja servodateallimis, kurssain, fitnodaga siskkáldas oahpahusain ja sullasaččain. Ulbmilin lea lágidit oahpahusa, mii heivehuvvo du dárbbuide. 

• Reálagelbbolašvuohta galgá árvvoštallojuvvot fága oahppoplánaid ektui, mii sáhttá mearkkašit sihke oktasašfágaid ja prográmmafágaid.
• Jos reálagelbbolašvuohta lea ovttaárvosaš gelbbolašvuođain, maid olaha formála oahpuin, de dat galgá dohkkehuvvot. Dalle dutnje lohket buorrin olles fága dahje dan osiid.
• Dohkkehuvvon reálagelbbolašvuohta fágas lea seammaárvosaš go fágas ceavzin.
• Dohkkehuvvon reálagelbbolašvuohta galgá duođaštuvvot gelbbolašvuođaduođaštusain, vejolaččat loahppaduođaštusain. 
• Don it dattetge sáhte oažžut reálagelbbolašvuođa árvvoštallama loahppaárvvoštallamin fágain, mat gullet fidnofágalaš oahppoprográmmaid Jo3-oahppoplánaide.

Jos leat rávesolmmoš, geas ii leat vuoigatvuohta joatkkaoahpahussii, de lea dus vuoigatvuohta oažžut iežat reálagelbbolašvuođa árvvoštallojuvvot, jos gielda dahje Bargo- ja čálgoetáhtta (NBČ/NAV) čujuha du fylkkagildii. Fylkkagielda sáhttá maid árvvoštallat eará rávesolbmuid reálagelbbolašvuođa, muhto sáhttá dalle váldit mávssu bálvalusas. 

Reálagelbbolašvuođa árvvoštallama váidaleapmi 

Dus lea vuoigatvuohta váidalit jos du reálagelbbolašvuohta ii dohkkehuvvo. Váidalusa don sáddet dan instánsii, mii lea árvvoštallan du reálagelbbolašvuođa. Go váidalat reálagelbbolašvuođa árvvoštallama, de čuvvot hálddahuslága 6. kapihttala njuolggadusaid, earret dan mii guoská váidalaninstánssa gelbbolašvuhtii.

Váidalanáigi lea 3 vahku.