Geas lea rávesolbmuid vuoigatvuohta?

• Dus lea rávesolbmuid vuoigatvuohta dan jagi rájes go deavddát 25 jagi. 
• Rávesolbmuid vuoigatvuohta guoská dutnje, gii leat čađahan vuođđoskuvlla dahje vástideaddji oahpu Norggas dahje nuppi riikkas, muhto it leat čađahan joatkkaoahpahusa.
• Rávesolbmuid vuoigatvuohta guoská maid dutnje, gii leat čađahan joatkkaoahpahusa nuppi riikkas, muhto it leat ožžon oahpu dohkkehuvvot Norggas.
• Vai oaččut vuoigatvuođa joatkkaoahpahussii, de eaktuduvvo ahte orut lobálaččat Norggas, ja ahte du orrunlohpeohcamuš lea mearriduvvon. 

Maid rávesolbmuid vuoigatvuohta mielddisbuktá?

• Rávesolbmuid vuoigatvuođain don oaččut vuoigatvuođa golmma jagi joatkkaoahpahussii, dahje guhkit áigái jos válddát fidnofágalaš oahpu, mas lea guhkit oahppoáigi. 
• Dus lea rávesolbmuid vuoigatvuohta dan jagi rájes go deavddát 25 jagi. 
• Rávesolmmožin dus lea vuoigatvuohta reálagelbbolašvuođa árvvoštallamii.
• Don galggat maid oažžut oahpahusa, mii lea heivehuvvon du dárbbuide, ja oahpahusfálaldaga, mii vástida loahppagelbbolašvuhtii, maid don sávat alccesat. Galgá nannosit deattuhit du vejolašvuođaid juksat fidno- dahje studerengelbbolašvuođa. 
• Čađahanvuoigatvuohta: Jos leat rávesolmmoš ja leat beassan joatkkaoahpahussii, de dus lea vuoigatvuohta beassat geargat oahpuin. Dat gusto geahčakeahttá dasa, leago dus rávesolbmuid vuoigatvuohta vai ii.

Iigo dus leat lágas nannejuvvon vuoigatvuohta? 

Fylkkagielda sáhttá maid fállat joatkkaoahpahusa dutnje, geas ii leat lágas nannejuvvon vuoigatvuohta. Dat guoská dutnje, gii

• leat massán vuoigatvuođa joatkkaoahpahussii dahje leat biddjon eret
• leat ovdal čađahan joatkkaoahpahusa
• leat olahan studeren- dahje fidnogelbbolašvuođa

Go ohccijoavkkut gilvalit oahpposajiin, de vuoruhit maŋimužžii du, gii leat olahan fidno- dahje studerengelbbolašvuođa.

Vuoigatvuohta oppalaš studerengelbbolašvuođa lasáhussii dan maŋŋá go lea olahan fidnogelbbolašvuođa, fágareivve dahje sváinnasreivve

Rávesolmmožin dus sáhttá leat vuoigatvuohta váldit oppalaš studerengelbbolašvuođa lasáhusa go leat čađahan ja ceavzán fága- ja fidnooahpahusas ja leat olahan fidnogelbbolašvuođa (masa gullá dahje ii gula fága-/sváinnasreive). Eaktuduvvo, ahte don 

• leat čađahan ja ceavzán fága- ja fidnooahpahusas 2014 dahje dan maŋŋá ja 
• ahte don leat dahkan dan ovdal dan jagi loahpa, go devdet 24 jagi, geahčakeahttá dasa leigo dus dalle nuoraidvuoigatvuohta vai ii.

Dus, gii deavddát namuhuvvon eavttuid, lea vuoigatvuohta váldit oppalaš studerengelbbolašvuođa lasáhusa goas fal ihkinassii.

Praksiskandidáhtain ja sis, geat eai leat ceavzán buot oktasašfágain, ii leat vuoigatvuohta oppalaš studerengelbbolašvuođa lasáhussii.