Oahpahuslága láhkaásahusas mearriduvvo, ahte sihke almmolaš ja priváhta joatkkaskuvllat galget gulahallat agivuloš ohppiid váhnemiiguin miehtá oahppojagi. Skuvla galgá  

• lágidit diehtojuohkinčoahkkima skuvlajagi álggus
• bovdet ságastallamii gulahallanoahpaheddjiin
• muitalit vuoigatvuođaid birra
• almmuhit jos oahppi jávká skuvllas
• muitalit eará dieđuid oahppi birra

Diehtojuohkinčoahkkin skuvlla álggus

Jo1 ja Jo2 ohppiid váhnemiidda galgá lágidit diehtojuohkinčoahkkima skuvlajagi álggus. Čoahkkimis váhnemiidda galgá muitalit skuvlla birra, oahpahusa sisdoalu birra, njuolggadusaid ja dábiid birra, váhnemiid vuoigatvuođas searvat skuvlla doaimmaide jna.

Ságastallan gulahallanoahpaheddjiin

Galgá unnimusat lágidit ovtta plánejuvvon ja strukturerejuvvon ságastallama Jo1 ja Jo2 ohppiid gulahallanoahpaheddjiin skuvlajagi vuosttaš jahkebealis. Ságastallamis galgá hállat dan birra mo oahppi bargá beaivválaččat ja oahppi gelbbolašvuođas fágain. Ságastallamis galgá maid čielggadit mo oahppi, skuvla ja váhnemat galget ovttasbarggus láhčit dilálašvuođaid oahppi oahppamii ja ovdáneapmái. 

Dieđut vuoigatvuođaid birra 

Váhnemat galget beassat diehtit makkár vuoigatvuođat ohppiin ja váhnemiin leat oahpahuslága vuođul ja oahpahuslága láhkaásahusa vuođul. Dieđuid sáhttá muitalit ovdamearkka dihte váhnenčoahkkimiin, skuvlla ruovttusiidduin dahje skuvlla oahppanvuogádagas neahtas, jos váhnemat besset dan sisa.

Ohppiid jávkama almmuheapmi

Váhnemiidda galgá muitalit oahppi jávkamis jogo njálmmálaččat dahje čálalaččat. Galgá almmuhit čálalaččat jos oahppi ii soaitte oažžut árvvoštallama árvosániin ovtta dahje máŋgga fágas, dahje jos oahppi ortnega ja láhttema árvosátni soaitá njiedjat. Váhnemiidda galgá almmuhit nu árrat, ahte sis lea vejolašvuohta dahkat maidnu áššiin. 

Eará dieđut ohppiid birra

Váhnemat galget oažžut eará dárbbašlaš dieđuid oahppi birra (earret dieđuid maidda jávohisvuođageatnegasvuohta guoská). Sáhttá leat sáhka das, ahte oahppi ii gávnna ráfi skuvladilis, dilihuddá ja moccáska diimmuin dahje eará láhkai ráfehuhttá psykososiála birrasa. 

Válddálaš oahppit 

Go oahppi lea deavdán 18 jagi, de ii leat skuvla šat geatnegas almmuhit váhnemiidda oahppi áššiin. Válddálaš oahppit sáhttet dattetge miehtat dasa, ahte skuvla ain almmuha váhnemiidda buotlágan áššiid birra dahje dihto áššiid birra.