Ortnega doallama ja láhttema árvvoštallama mihttomearri lea 

• ovddidit du sosialiserenproseassa
• ráhkadit buori psykososiála birrasa
• muitalit du ortnega doallama ja láhttema birra 

Ortnega doallama ja láhttema árvvoštallama vuođđu čatnasa dasa, mo don láhttet skuvlla njuolggadusaid ektui. Don galggat diehtit ja dovdat mii lea árvvoštallama vuođđun ja mii deattuhuvvo ortnega doallama ja láhttema árvvoštallamis. Jos it boađe diimmuide, soaitá du ortnega dahje láhttema árvosátni njiedjat.

Go mearridit ortnega ja láhttema árvosáni, de galget váldit vuhtii du eavttuid. Dábálaččat eai galgga menddo deattuhit ovttaskas dáhpáhusaid, earret jos ovttaskas dáhpáhus lea ereliiggán váidalahtti dahje roavis.

Ortnega doallama ja láhttema árvosánit leat «Buorre», «Viehka buorre» ja «Ii nu buorre». Ortnega doallama ja láhttema árvvoštallama galgá doallat sierra du fágalaš gelbbolašvuođa árvvoštallamis.

Ortnega ja láhttema jahkebealleárvvoštallan gullá jagi áigge addojuvvon jotkkolaš árvvoštallamii, ja olles oahpahusa áigge galgá addit árvvoštallama árvosáni haga. Jahkebealleárvvoštallan, mii addojuvvo árvosátnin, addojuvvo guđege oahppojagi oahpahusáigodaga beallemuttus ja loahpas dassái go leat iežat skuvlaoahpahusa maŋimuš jagis.

Ortnega ja láhttema oppalašárvosátni addojuvvo go dus nohká skuvlaoahpahus oahppoplánabuktosa mielde. Dat mearkkaša Jo3 studeremii ráhkkanahtti oahppoprográmmain ja Jo2 maŋŋá eanaš fidnofágalaš oahppoprográmmain.