Mearrádusaid, mat gusket ohppuiváldimii oktagaslaš meannudeami vuođul, don gávnnat i oahpahuslága láhkaásahusa 6. kapihttalis.  

Ohppuiváldin Jo1-ceahkkái

Du eai galgga váldit ohppui čuoggáid vuođul, muhto baicce oktagaslaš meannudeami vuođul, jos dus

• lea vuoigatvuohta erenoamášoahpahussii ja dus váilu árvosátni eanet go bealis fágain.
  Ohcanáigemearri guovvamánu 1. beaivi.
  
• lea leamaš vuoigatvuohta erenoamáš giellaoahpahussii ja dus váilu árvosátni eanet go bealis fágain.
  Ohcanáigemearri guovvamánu 1. beaivi.
  
• váilu árvosátni eanet go bealis fágain eará sujaid geažil.
  Ohcanáigemearri njukčamánu 1. beaivi.
  
• eai leat lohkoárvosánit dahje árvosátnevuođđu, maid sáhttá geavahit buohtastahttimii.
  Ohcanáigemearri njukčamánu 1. beaivi.
  
• du ferte meannudit oktagaslaččat eará erenoamáš, duođalaš sujaid geažil.
  Ohcanáigemearri guovvamánu 1. beaivi.
  

Jos du váldet ohppui oktagaslaš meannudeami vuođul,  de dus ii leat vuoigatvuohta beassat dihto oahppoprográmmii, muhto baicce vuoigatvuohta beassat ovtta oahppoprográmmii oktiibuot golmma oahppoprográmmas, maid ledjet vuoruhan.

Ohppuiváldin Jo2- ja Jo3-ceahkkái

Erenoamášoahpahus dahje plánejuvvon vuođđogelbbolašvuohta

Du eai galgga váldit ohppui čuoggáid vuođul, muhto baicce oktagaslaš meannudeami vuođul, jos dutnje lea mearriduvvon erenoamášoahpahus ovddit jahkeceahkis nu ahte mearrádusa geažil it oaččo árvosátneárvvoštallama máŋgga fágas.

Ohppuiváldin dahkkojuvvo dalle ollislaš árvvoštallama vuođul, mas geahčadit sáhttágo du eavttuid vuođul bealuštit, ahte joatkkát maŋit jahkeceahkkái. Árvvoštallamis galget deattuhit sihke áššedovdi árvvoštallama ja du vuoruhemiid. Du váldet dalle oahppin Jo2- dahje Jo3-prográmmasuorgái, man vuođđun lea dat Jo1-oahppoprográmma dahje Jo2-prográmmasuorgi, maid ovdal leat čađahan.

Dat guoská maiddái dutnje, gii čuovut plánejuvvon oahppoluotta, mainna olahat vuođđogelbbolašvuođa. 
Ohcanáigemearri guovvamánu 1. beaivi.

Eai leat lohkoárvosánit dahje ii leat árvosátnevuođđu, mii heive buohtastahttimii

Du galget váldit oahppin oktagaslaš meannudeami vuođul ja vejolaččat du ovddit skuvlla cealkámuša vuođul, jos dus eai leat lohkoárvosánit dahje Jo1 dahje Jo2 árvosátnevuođđu, mii heive buohtastahttimii.
Ohcanáigemearri njukčamánu 1. beaivi.

Jos it leat ceavzán ovtta dahje máŋgga fágas ovddit ceahkis

Du sáhttet váldit ollesáigeoahppin Jo2- dahje Jo3-ceahkkái, vaikko it livččege ceavzán ovtta dahje máŋgga fágas ovddit ceahkis.

Fylkkagielda ferte dalle iskat ollislaš árvvoštallama vuođul, heivego nu dahkat. Dalle fertejit geahčadit, leago dokumenterejuvvon ahte dus lea gelbbolašvuohta, mii oahppoplánaid vuođul gáibiduvvo vai sáhtát čuovvut boahtte jahkeceahki oahpahusa, ja ahte deavddátgo ollislaččat fágalaš eavttuid, mat gáibiduvvojit dan dási oahpahusas.

Jos it deavdde eavttuid, maid vuođul sáhtát váldot ollesáigeoahppin, de sáhtát ohcat beassat oasseáigeoahppin. Dalle du váldet ohppui ollesáigeohppiid maŋábealde.  
Ohcanáigemearri njukčamánu 1. beaivi.

 

Eará duođalaš sujat 

Du sáhttet maid váldit Jo2- dahje Jo3 oktagaslaš vuođuin, jos leat duođalaš sujat dasa, ja dus leat erenoamáš dárbbut.  

Ohcanáigemearri guovvamánu 1. beaivi.