Nuorain geat leat čađahan vuođđoskuvlla dahje vástideaddji oahpu, lea lágas nannejuvvon vuoigatvuohta golmma jagi joatkkaoahpahussii (nuoraidvuoigatvuohta).* Nuoraidvuoigatvuohta gusto skuvlajagi lohppii dan jagi go deavddát 24 jagi.

Mii lea nuoraidvuoigatvuohta?

• Nuoraidvuoigatvuohta addá dutnje vuoigatvuođa golmma jagi joatkkaoahpahussii, dahje eanet jagiide, jos oahppaáigi mearriduvvon guhkibun oahppoplánas.  
• Go ozat Jo1-ceahkkái, de galggat almmuhit golbma molssaevttolaš oahppoprográmma dan ortnegis, go daid vuoruhat. Dus lea vuoigatvuohta oahpposadjái ovttas dain surggiin. 
• Dus lea vuoigatvuohta skuvlasadjái dan fylkkas, man ássin don leat registrerejuvvon ohcanáigemeari loahpas, muhto dus ii leat vuoigatvuohta sadjái dihto skuvllas. 
• Go leat čađahan Jo1, de lea dus vuoigatvuohta guovtti jagi joatkkaoahpahussii prográmmasuorggis, man vuođđun lea dat oahppoprográmma dahje prográmmasuorgi, maid leat válljen, muhto dus ii leat vuoigatvuohta beassat dan prográmmasuorgái, maid leat vuoruhan bajimužžii. Dat guđe prográmmasuorgái dutnje fállet saji nuppi ja goalmmát jahkái, lea gitta das, maid du ruovttufylka fállá. Du árvosánit sáhttet mearridit beassatgo dan suorgái, maid háliidat.
• Jos leat čađahan ja ceavzán fidnofágalaš oahpus, de lea dus vuoigatvuohta ovtta jagi oppalaš studerengelbbolašvuođa lasáhussii.
• Nuoraidvuoigatvuohta addá muhtun oktavuođain dutnje vuoigatvuođa guhkit oahppoáigái (jos dus lea erenoamáš oahpahus dahje jos válljet ođđasit.