Nugo namuhuvvon, fitnodagat dat ieža válljejit geasa fállet oahppasaji. Don it leat dáhkiduvvon oahppasaji vaikko dus livččege buorit árvosánit. Máŋgii evttohasaid bovdejit jearahallamii. Berret ráhkkanit dakkár jearahallamii nu bures go sáhtát. Vuolábealde leat muhtin rávvagat ráhkkaneapmái.

• Oza dieđuid fitnodaga birra ovddalgihtii. It dárbbaš diehtit buot fitnodaga birra, muhto dutnje alccesat soaitá leat álkit jearrat dieđuid fitnodaga birra, ja barggu birra, jos dieđát vehá ovddalgihtii. Dan láhkai čájehat ahte beroštat oahppasajis.
  
• Smiehta gárvvisin muhtin jearaldagaid, mat čájehit ahte don beroštat fitnodagas ja oahppasajis.
  
• Smiehta manin don hálidat oahppasaji aiddo dan fitnodagas. Dus vedjet jearrat aiddo dan jearaldaga - ja dalle lea buoremus vástidit maidnu positiivvalačča, ovdamearkka dihte: «Mu mielas dát orru hui gelddolaš fidnu.», «Mus lea álo leamaš miella šaddat mohtormekanihkarin, ja mu mielas orru ahte dán fitnodagas lea hui buorre bargat.»
  
• Smiehta mat leat du buorit ja heajos bealit. Dan maid jerret máŋgii, ja veadjá gánnehit ovddalgihtii hárjehallat dakkár jearaldagaide vástideami. Sáhttá gánnehit válljet dakkár negatiiva iešvuođa, maid sáhttá jorgalit positiivvalažžan. Jos don leat ovdamearkka dihte gierdameahttun, de sáhtát dasa laktit ahte don hálidat oaidnit bohtosiid iežat barggus. Mávssoleamos lea ahte dus lea realisttalaš iešgovva.
  
• Rollaspeallan sáhttá leat ávkkálaš. Divtte geannu, gii dovdá du bures, jearahallat iežat, nu ahte hárjánat vástidit gažaldagaid iežat birra. Sáhtát maid čuožžut speadjala ovddas «jearahallamin» iežat.
  
• Smiehta mo gárvodat go manat jearahallamii - it galgga menddo čiŋadit, muhto gánneha gárvodit čorgadit.
  
• Vuosttaš govva lea mávssolaš - buorastahte nannosit ja geahča čalmmiide.
  
• Čájet ahte beroštat fitnodagas ja oahppasajis. Jearral dađistaga gažaldagaid, muhto divtte fitnodaga jođihit ságastallama.
  
• Mávssoleamos: Čájet ahte hálidat bargui!