Skuvla ii sáhte geatnegahttit du oastit alccesat skuvlagirjjiid dahje iežat dihtora. Mávssuhis oahpponeavvuid ja digitála reaidduid ortnega ollašuhttet iešguđet láhkai sierra fylkkain. Skuvllain leat dábálaččat oahppogirjjiid ja salladihtoriid luoikanortnegat. 

Muhtin fylkkain fállet ahte beasat geavahit iežat dihtora ja/dahje oastit dihtora sierra soahpamušain. Dutnje muitalit lagabui dan birra ovdal go skuvla álgá.

Skuvla sáhttá geatnegahttit du háhkat eará individuála reaidduid, mat dárbbašuvvojit oahpus.

Mávssuhis oahpponeavvuid ja reaidduid ortnet ii guoskka fidnoohppiide iige oahppokandidáhtaide.  

Salladihtor

Jos skuvla lágida oahpahusa dan láhkai ahte dus galgá leat dihtor sihke ruovttus ja skuvllas, de skuvla galgá ordnet dutnje dihtora. Skuvla sáhttá dalle gáibidit, ahte don mávssát juohke jagi dihto iežasoasi dihtora ovddas. Ovtta jagi iežasoassi ii sáhte leat eanet go reaidostipeandda vuolimus mearri. Joatkkaskuvlla maŋŋá galggat beassat doallat dakkár dihtora. 

Jos it ollašuhte oahpu, dahje dus ii leat leamaš dihtor golbma jagi, de galgá skuvla fállat ahte beasat oastit dihtora. Ollislaš máksu ii dalle galgga leat eanet go golbma gearddi reaidostipeandda vuolimus máksomearri, rehkenastojuvvon dan áiggi mielde, goas gaskkalduhttet oahpu.