Loatnakássa loatna ja stipeanda

Jos leat fidnooahppi, oahppokandidáhtta dahje praksisreivekandidáhtta, de sáhtát ohcat Loatnakássas sihke stipeandda ja loana oahppoáigái. Sáhtát oažžut doarjaga 11 mánnui skuvlajagis.

Don fertet deavdit dihto eavttuid, vai oaččut doarjaga. Loga eavttuid birra neahttasiiddus lanekassen.no/

Vuolábeale doarjjamearit gustojit skuvlajahkái 2022-2023. 

Orrunstipeanda - go it oro ruovttus

Jos oahpu áigge fertet orrut eará sajis go ruovttus fuolaheddjiid luhtte, de sáhtát oažžut orrunstipeandan eanemustá 4 979 kruvnno mánnui. Stipeanda addojuvvo dárbbu ektui, ja geahpeduvvo dađistaga go dinet eanet go 15 723 kruvnno mánnui. 

Don fertet ollašuhttit ovtta dáin eavttuin vai dus lea vuoigatvuohta orrunstipendii:

  • Bargosadji lea guhkkelis go 40 km geažes váhnemiid ruovttus.
  • Johtináigi váhnemiiddát geahčen bargosadjái ja ruovttoluotta lea golbma diimmu dahje eanet. 
  • Erenoamáš persovnnalaš dahje sosiála dilli dagaha, ahte it sáhte orrut ruovttus.

Vuođđostipeanda dárbbu vuođul 

Dasa man ollu don oaččut vuođđostipeandda váikkuha man stuorra bálkká don oaččut fidnooahppin, man ollu du fuolaheaddjit dinejit ja galle oappážaga dus leat, geat leat riegádan 2004 dahje maŋŋá. Jos du bálká fidnooahppin lea eanet go sullii 5 702 kruvnno mánnui, de it oaččo vuođđostipeandda. 

Vuođđostipeanda lea jurddašuvvon gokčat daid ohppiid eallingoluid, geaid bearrašis lea heajos ráđđi. Dat geat ožžot vuođđostipeandda sáhttet oažžut eanemustá 3 489 kruvnno mánnui. Loga eanet neahttasiiddus lanekassen.no/larling.

Loatna go it oro ruovttus ja leat deavdán 18 jagi

Jos dus lea nuoraidvuoigatvuohta, de sáhtát váldit eanemustá 3 399 kruvnno loana mánnui, jos leat deavdán 18 jagi, itge oro šat váhnemiiddát luhtte. Loga eanet neahttasiiddus lanekassen.no/lån for lærlinger med ungdomsrett.

Ná ozat

Don fertet vuordit stipeandda ja loana ohcamiin Loatnakássas, dassái go leat dahkan dohkkehuvvon oahppošiehtadusa/oahpahusšiehtadusa. Dalle sáhtát ohcat neahttasajis lanekassen.no.

Logge sisa ohcamuššii MinID dahje BankID vehkiin, nu mo skuvla- dahje oahpposaji ozadettiinat.

Vuollái 18 jagi? Bivdde váhnemiiddát ásahit dutnje digitála poastakássa ovdal go ozat.

Jos it leat deavdán 18 jagi, de fertejit du váhnemat vuolláičállit doarjjasoahpamuša du ovddas. Dan soai sáhttiba dahkat elektrovnnalaččat. Jos soai ásaheaba digitála poastakássa ovdal go ozat, de soai oažžuba vástádusa digitála poastakássii, ja sáhttiba de vajot vuolláičállit du ovddas.

Du váhnen guovttos sáhttiba ásahit digitála poastakássa (Digipost dahje e-Boks) neahttasiiddus www.velgdigitalpostkasse.no. Áidna mii dárbbašuvvo lea BankID.

Ohcanáigemearit

Fidnooahppit/oahppokandidáhtat/praksisreivekandidáhtat galget sáddet skuvlajagi 2021-2022 ohcamuša Loatnakássii  
  • ovdal geassemánu 30. b. 2022 dahje
  • ovdalgo oahppoáigi nohká, jos dat nohká ovdal geassemánu 30. b. 2022

Čuovo ohcamuša iežat siidduin

Neahttasiiddus lanekassen.no don gávnnat dieđuid stipeandda ja loana birra, maid sáhtát oažžut ohppui Norggas ja olgoriikkas. Doppe sáhtát maid logget sisa iežat siidduide (Dine sider), main sáhtát earret eará

  • ohcat doarjaga
  • čuovvut iežat ohcamuša
  • geahččat man ollu leat ožžon doarjaga ja goas ruđat bohtet

Eará stipeanddat ja legáhtat

Leat ollu vejolašvuođat oažžut stipeanddaid, geahča Eará stipeanddat ja legáhtat.

Ovttage fylkkas eai leat mearkkašumit dán čuoggái