Loatnakássa loatna ja stipeanda



Jos don leat joatkkaskuvlaoahppi, de sáhtát ohcat Loatnakássas loana ja stipeandda. Buot oahppit ožžot reaidostipeandda, muhtumat ožžot orrunstipeandda ja muhtumat ožžot vuođđostipeandda. Don sáhtát oažžut stipeandda logi mánnui juohke skuvlajagi.

Don sáhtát oažžut loana joatkkaoahpahussii dušše jos leat deavdán 18 jagi, itge oro váhnemiiddát luhtte. Loga eanet:lanekassen.no/

Don ozat stipeandda ja loana oktasaš ohcamušain. Go ozat, Loatnakássa dárkkista automáhtalaččat masa dus lea vuoigatvuohta.

Reaidostipeanda - muitte ohcat! 

Jos váccát Jo1, Jo2 ja Jo3 ja dus lea nuoraidvuoigatvuohta, de oaččut reaidostipeandda Loatnakássas. Don oaččut stipeandda geahčakeahttá dasa man ollu du váhnemat dinejit, muhto fertet ohcat vai oaččut. Oza go leat ožžon skuvlasaji.

Fidnoohppiin, oahppokandidáhtain ja praksisreivekandidáhtain ii leat vuoigatvuohta reaidostipendii, muhto sis sáhttá leat vuoigatvuohta lotnii dahje eará stipeanddaide. 

Orrunstipeanda - go it oro ruovttus

Dus veadjá leat vuoigatvuohta orrunstipendii, mii lea 4 709 kruvnno mánnui (2021-2022), jos fertet orrut eará sajis go váhnemiiddát luhtte, go váccát joatkkaskuvlla. Dasa lassin ferte unnimustá okta vuolábeale gáibádusain dievvat:

  • Skuvla lea guhkkelis go njealje miilla geahčen váhnemiiddát ruovttus.
  • Beaivválaš johtináigi váhnemiiddát ruovttu ja skuvlla gaskka (ovdan ruoktot) lea golbma diimmu dahje eanet. Skuvla ferte duođaštit dan.
  • Erenoamáš dilit - persovnnalaš dahje sosiála ákkat - dahket, ahte don it sáhte orrut ruovttus. 

Dus veadjá maid leat vuoigatvuohta johtinstipendii, geahča.

Vuođđostipeanda dárbbu vuođul 

Vuođđostipeanda lea oaivvilduvvon doarjjan, mainna gokčat daid ohppiid eallingoluid, geaid bearrašis ii leat nu buorre ráđđi. Vuođđostipeandda sáhttá oažžut eanemustá 3 421 kruvnno mánnui (2021-2022). Vuođđostipeandda sturrodahkii váikkuha man ollu fuolaheaddjit dinejit ja galle oappáža dus leat, geat leat riegádan 2003 dahje dan maŋŋá.

Ná ozat

Go leat ožžon skuvlasaji ja leat vástidan ahte válddát dan, de ozat stipeandda ja loana Loatnakássas. Seammá ohcanskovvi geavahuvvo goappá doarjaga dal ozažat. 

Logge sisa ohcamuššii MinID dahje BankID vehkiin, nu mo dahket go ohcat skuvla - dahje oahppasaji.

Vuollái 18 jagi? Bivdde váhnemiiddát ásahit dutnje digitála poastakássa ovdal go ozat

Jos it leat deavdán 18 jagi de ferteba du váhnen guovttos vuolláičállit doarjjasoahpamuša du ovddas. Dan sáhttiba dahkat elektrovnnalaččat. Jos soai ásaheaba digitála poastakássa ovdal go ozat, de boahtá vástádus digitála poastakássii, ja sáhttiba de vajot vuolláičállit du ovddas.

Dá váhnen guovttos sáhttiba ásahit digitála poastakássa (Digipost dahje e-Boks) neahttasiiddus www.velgdigitalpostkasse.no. Áidna maid dárbbašeaba lea BankID.

Ohcanáigemearit

Ohcamuš ferte leat boahtán Loatnakássii ovdal 

  • skábmamánu 15. b. čakčajahkebealis
  • njukčamánu 15. b. giđđajahkebealis

Čuovo ohcamuša iežat siidduin

Siiddus lanekassen.no don gávnnat dieđuid stipeandda ja loana birra, maid sáhtát oažžut ohppui Norggas ja olgoriikkas. Doppe logget maid sisa iežat siidduide, main earret eará sáhtát

  • ohcat doarjaga
  • čuovvut iežat ohcamuša
  • geahččat man ollu leat ožžon doarjaga ja goas ruđat bohtet

Vállje iežat fylkka!

Dáin fylkkain leat lassidieđut dán čuoggái: