Háliidatgo ohcat alit ohppui fidnofágalaš oahpu maŋŋá? Dábálaččat dus galgá leat oppalaš studerengelbbolašvuohta, vai beasat allaskuvlii dahje universitehttii, muhto leat maiddái molssaevttolaš vuogit beassat alit ohppui maŋŋá go leat lohkan fidnofágaid.

Háliidatgo olahit oppalaš studerengelbbolašvuođa, vai sáhtát ohcat alit ohppui?

Oppalaš studerengelbbolašvuođa lasáhus
Sáhtát ohcat oppalaš studerengelbbolašvuođa lasáhussii, go leat čađahan Jo2 fidnofágalaš oahppoprográmmas, dahje go leat olahan fidnogelbbolašvuođa. Don olahat studerengelbbolašvuođa, go leat čađahan ja ceavzán jagi lasáhusoahpu, ja de beasat ohcat alit ohppui allaskuvlii dahje universitehttii. 

23/5-njuolggadus
Jos leat deavdán 23 jagi, ja dus lea oktiibuot 5 jagi bargovásáhus ollesáiggebarggus ja/dahje oahpus (23/5-njuolggadus) de sáhtát olahit oppalaš studerengelbbolašvuođa dan láhkai ahte čađahat dáid oktasašfágaid:

• Eaŋgalsgiella 140 diimmu
• Historjá 140 diimmu
• Matematihkka 224 diimmu
• Luonddufága 140 diimmu
• Dárogiella 393 diimmu
• Servodatfága 84 diimmu
  

Neahttasiiddus samordnaopptak.no sáhtát lohkat makkár bargu ja makkár oahppu gealbudahttá du 23/5-njuolggadussii.

Sávatgo molssaevttolaš luotta alit ohppui?

F-luodda 
F-luodda (dárogillii Y-veien) lea ožžon namas «fidnoluottas» (yrkesveien), ja lea muhtun allaskuvllaid ja universiteahtaid fálaldat dutnje, geas lea fitnofágalaš oahppu, muhto geas ii leat relevánta fágareive, sváinnasreive iige fidnogelbbolašvuohta. Muhtun oahpuide gáibiduvvo maiddái unnimustá 12 mánu relevánta bargohárjehallan. Neahttasiiddus utdanning.no gávnnat logahallama vejolaš Y-luottain. 

Ohppui beassan reálagelbbolašvuođa vuođul
Don sáhtát ohcat universiteahtaid ja allaskuvllaid oahpuide reálagelbbolašvuođa vuođul.

• Jos it sáhte duođaštit oppalaš studerengelbbolašvuođa ja leat 25 jagi dahje boarrásut, de dus lea vuoigatvuohta árvvoštallojuvvot leatgo gelbbolaš ohppui reálagelbbolašvuođa vuođul. 
• Oahppoásahus dat árvvoštallá mii lea dárbbašlaš gealbu ja mearrida mii lea ulbmillaš ja heivvolaš vuohki dahkat dakkár árvvoštallamiid.
• Du gealbu galgá árvvoštallojuvvot dan fága ektui, maid áiggošit studeret. 
• Vaikko dus leage reálagelbbolašvuohta dihto fága studeremii, de it sáhte dan vuođul gáibidit alccesat studerengelbbolašvuođa eará fágaide dahje oahpuide.
  

Neahttasiiddus samordnaopptak.no don sáhtát lohkat eanet dan birra mo beasat ohppui reálagelbbolašvuođa vuođul.

Fágaskuvlaoahppu
Fágaskuvlaoahppu lea alit fidnofágalaš oahppu, mii bistá jahkebealis gitta guovtti jahkái. Fágaskuvlii beassá, jos lea fidnogelbbolašvuohta, oppalaš studerengelbbolašvuohta dahje reálagelbbolašvuohta.

• Fágaskuvla addá fidnooahpu, mii lea njuolga ávkin bargoeallimis.
• Oahpat ovttastahttit teoriija ja geavatlaš doaimmaid, go barggat bargguid, mat leat lahka duohtaeallima.
• Oahppu galgá ovddidit reflekterejuvvon fidnobargiid, ja addá ollu bargovejolašvuođaid priváhta ja almmolaš suorggis.