Fágaskuvlaoahppu

Fágaskuvlaoahppu vuođđuduvvá joatkkaskuvlaohppui dahje sullasaš  reálagelbbolašvuhtii, ja lea molssaeaktu allaskuvla- ja universiteahttaohppui. Fágaskuvllaide beassan eaktuda, ahte dus lea fidnogelbbolašvuohta, mas dus lea dahje ii leat fága-/sváinnasreive, dahje oppalaš studerengelbbolašvuohta.

Fágaskuvla galgá addit dihto fidnui gullevaš joatkkaoahpu, maid sáhtát njuolga geavahišgoahtit bargoeallimis. Don oahpat ovttastahttit teoriija ja geavatlaš gálggaid, go barggat duohtamáilbmái lagaš bargobihtáiguin. Oahppu galgá ovdánahttit reflekterejuvvon fidnobargiid, ja go leat geargan oahpuin de dus galgá leat vuođđu olles eallinahkái oahppat lasi ja hárjánit ođđa diliide dađistaga. Go leat čađahan fágaskuvlla, dus leat ollu vejolašvuođat, earret eará priváhta ja almmolaš suorggi gaskajođiheaddjin.

Fágaskuvlaoahpu láhka nanne, ahte oahppu bistá unnimusat beali oahppojagis ja eanemusat guokte oahppojagi. Dohkkehuvvon fágaskuvlaohppui lea vuoigatvuohta oažžut loana ja stipeandda Loatnakássas.  

Nationála fágaskuvlaráđđi lea ráđđeaddi orgána, maid Máhttodepartemeanta lea nammadan. Dat galgá earret eará buoridit ovttasbarggu fágaskuvllaid, oahppovuogádaga eará osiid ja bargoeallima gaskka. Fágaskuvlaráđđi lea ráhkadan diehtojuohkinmateriála fágaskuvllaid birra

Dohkkehuvvon fágaskuvlafálaldagat

Leat sihke almmolaš ja priváhta fágaskuvllat, ja sáhtát gealbudahttit iežat ollu sierralágan gelddolaš fidnuide.

Fágaoahpuid dohkkeha Nasjonalt Organ for Kvalitet i Utdanningen - NOKUT. Neahttasajis nokut.no oainnát makkár fágaskuvlaoahput dál leat dohkkehuvvon, ja gávnnat liŋkkaid sierra fágaskuvllaid ruovttusiidduide, main almmustahttet earret eará ohppuiváldingáibádusaid, ohcanáigemeriid ja ohcanvugiid.

Dohkkehuvvon fágaskuvlaoahpuid fállet earret eará dáin surggiin:

  • Hálddahus, jođiheapmi, ekonomiija, bargoeallin
  • Dearvvašvuohta, sosiálafága, bajásšaddan ja čálgu
  • DGT
  • Dáidda, kultuvra, design ja duodji
  • Media ja gulahallan
  • Biras, eanandoallu ja luondduhálddašeapmi
  • Ođđa luovvalas fágat
  • Mátkkošteapmi ja merkantiila fágat
  • Teknihkka ja teknologiija

Muhtun fágaskuvllat ovttasbarget Norgga ja olgoriikka allaskuvllaiguin, nu ahte lea vejolaš viiddidit fágaskuvlaoahpu bachelordási ja vejolaččat masterdási oahppun. 

Fylkkagielddaid fágaskuvlafálaldagat 

Fylkkagielddat fállet fágaskuvlaoahpuid eanaš teknihkalaš ja teknologalaš fágain ja dearvvašvuođa- ja bajásšaddanfágain. Eanaš daidda fágaskuvllaide beassan eaktuda, ahte dus lea fidnogelbbolašvuohta, mas dus lea dahje ii leat fága-/sváinnasreive. Neahttasajis www.fagskoleopptak.no logahallet earret eará skuvllaid, ja guđe fágasuorggit ja čiekŋunvejolašvuođat sierra skuvllain leat, ohppuiváldingáibádusaid ja dárbbašlaš čujuhusaid ja telefonnummiriid.

Vuolábealde oainnát fágasurggiid, maid fylkkagielddaid fágaskuvllat fállet:  

  • Áhpedoallu (Havbruk)
  • Dáhtateknihkka
  • Dáidda ja dáiddagiehtaduodji
  • Dearvvašvuohta ja bajásšaddan
  • Elektro
  • Filbma ja govva
  • Hotealla ja mátkeealáhus
  • Huksen ja ráhkadus
  • Jođiheapmi
  • Kemiija
  • Maritiibma fágat
  • Petroleumteknologiija
  • Teknihkka/teknologiija
  • Vuovde-, eanan- ja gilvvagárdedoallu

 

Ohcan ja ohcanáigemearri

Don ozat ollesáiggeoahpuide vigo.no bokte (logge siidui MinID vehkiin). Ohcanáigemearri lea cuoŋománu 15. beaivi. Duođaštusaid don fertet sáddet poastta mielde dan skuvlii, maid leat válljen ovddemuš čiekŋumin. Duođaštusain galgá leat maŋimusat cuoŋománu 15. beaivve poastasteampil, ja dat galget leat skuvllas ovdal cuoŋománu 20. beaivvi. Dutnje vástidit miessemánu 15. beaivvi sulaid.

Muhtin skuvllain leat neahttafálaldagat ja/dahje oasseáigefálaldagat. Jos háliidat ohcat oahppin dakkár fálaldagaide, fertet váldit njuolga oktavuođa skuvllain. Skuvllaid čujuhusaid gávnnat neahttasajis www.fagskoleopptak.no. Eanaš dakkár fálaldagaide sáhttá ohcat vigo.no bokte, geahča fágaskuvlaoahpu fáttá.

Eanet dieđuid ohcanvugiin ja sullasaš áššiin addá: 

Nasjonalt opptakskontor for fagskolen/
Fágaskuvlla nationála ohppuiváldinkantuvra

Poastačujuhus Poastaboksa 767, 4004 Stavanger
Fitnan Arkitekt Eckhoffs g 1 (Stavangera boares buohcceviessu) uksa 7
Telefovdna 51 51 68 85 
E-poasta fagskoleopptak@rogfk.no
Neahttasajit www.fagskoleopptak.no