Fága- dahje sváinnasiskosa čađahit go lea geargan oahppoáiggiin, ja maŋimušat guokte mánu oahppoáiggi nohkama maŋŋá. Iskosa vuođđun leat oahppoplána gelbbolašvuođaulbmilat, ja das leat njeallje oasi:

• Plánet barggu ja vuođuštit válljejuvvon čovdosiid
• Čađahit fágalaš barggu
• Árvvoštallat iežas iskkusbarggu
• Dokumenteret iežas iskkusbarggu 

Iskosa guhkkodat almmuhuvvo fága oahppoplánas. 

Jos it ceavzze fága- dahje sváinnasiskosis, sáhtát iskat ođđasit. Oahppofitnodat galgá bargat dan ovdii, muhto dat ii leat geatnegahttojuvvon guhkidit oahppošiehtadusa nuppi iskosa rádjai. Jos sihke don ja fitnodat leat ovtta oaivilis dan hárrái, de sáhttá oahppoáigi guhkiduvvot eaktodáhtolaš soahpamušain.

Ovdalgo don sáhtát čađahit fága- dahje sváinnasiskosa, de fertet dábálaččat leat ceavzán buot Jo1- ja Jo2-dási fágaid, maidda du oahppofága vuođđuduvvá. Sierraluoddafágain ii leat Jo2 skuvllas, nu ahte don fertet čuovvut sihke prográmmafágaid ja oktasašfágaid oahpahusa oahppoáiggis, ja váldit dárbbašlaš eksámeniid ovdalgo sáhtát čađahit fága- dahje sváinnasiskosa.

Dihto oahppofágain, elektrofágaid ja teknihka ja industriijabuvttadeami oahppoprográmmain don galggat čađahit sierra eksámena Jo3-dásis ovdalgo sáhtát čađahit fága- dahje sváinnasiskosa. Oahppoplánain boahtá ovdan guđe fágaide dat guoská.

Oahpahuslága láhkaásahusas leat mearriduvvon muhtun spiehkastagat gáibádussii, man mielde galgá leat ceavzán unnimusat guovtti oktasašfágas. Eanet dieđuid oaččut skuvllastat.

Fága- ja sváinnasiskosiin geavahit árvosániid «Ceavzán hui bures», «Ceavzán» ja «Ii ceavzán».