Finmekanikar (fagbrev)

Finmekanikaren byggjer saman måle- og kontrollutstyr og justerer det. Døme på produkt kan vere delar til mikroskop, instrument og utstyr til laboratorieforsking. Sentrale arbeidsområde er

• produksjon av delar og utstyr (mekaniske, pneumatiske, hydrauliske, optiske og elektroniske komponentar) for styring, kontroll og måling
• teikning og konstruksjon av løysing
• val av eigna materiale
• bruk av DAK/DAP og manuelle verktøymaskiner som dreiebenk, fresemaskin og boremaskin
• sliping, liming, samanføying, overflatebehandling, lodding og platebearbeiding

Ein finmekanikar må kunne arbeide planmessig og sjølvstendig. Produkta er ofte små og lette, noko som igjen krev fine toleransar og pasningar. Du bør ha godt handlag, evne til å arbeide nøyaktig, vere god i matematikk, vere fingerferdig og ha evne til å sjå både teoretiske og praktiske løysingar. Språk som tysk og engelsk er vanlege i manualar og tekniske oppslagsverk.