Læreplan for service, sikkerhet og administrasjon

Læreplanen er hentet fra https://www.udir.no/lk20/ssh02-01
Fagrelevans og sentrale verdiar

Vg2 service, sikkerheit og administrasjon handlar om å utdanne sjølvstendige og omstillingsdyktige fagarbeidarar som kan bidra til ei effektiv og berekraftig drift av verksemder. Programfaga skal ruste elevane til å koordinere og administrere driftsoppgåver og førebyggje og handtere risikosituasjonar. Vidare handlar vg2 service, sikkerheit og administrasjon om å gjere elevane i stand til å informere, kommunisere og samhandle med ulike servicemottakarar og yte og tilpasse service til ulike målgrupper.

Alle fag skal bidra til å realisere verdigrunnlaget for opplæringa. Vg2 service, sikkerheit og administrasjon skal bidra til å utvikle forståing for individet og kulturelt mangfald. På denne måten skal programfaga gjere elevane rusta til å kunne møte og samhandle med ulike kundar, brukarar, publikum, kollegaer og samarbeidspartnarar på ein respektfull måte.

Kjerneelement

Sikkerheit og beredskap
Kjerneelementet sikkerheit og beredskap handlar om å skape tillit og sikkerheit i relasjonar og i samhandling med ulike servicemottakarar. Dette inneber å ha kunnskap om ulike identitetar og gruppefellesskap og om å bruke passande kommunikasjonsmetodar for å møte desse servicemottakarane på ein profesjonell og respektfull måte. Vidare handlar kjerneelementet om å vurdere og redusere risiko, bruke beredskapsplanar og følgje rutinar for sikkerheit og personvern i informasjons- og kommunikasjonsteknologi for å førebyggje uønskte hendingar.

Drift og berekraftig utvikling
Kjerneelementet drift og berekraftig utvikling handlar om å utføre oppgåver som støttar ei berekraftig utvikling, styring og drift av verksemder. Dette inneber å handtere dokument, assistere i administrative prosessar og utføre oppgåver knytte til økonomi, lønn og rekneskap. Vidare inneber det å utnytte ressursar effektivt, følgje etiske retningslinjer og drøfte regelverk og avtalar som regulerer arbeidsforholdet.

Service og kommunikasjon
Kjerneelementet service og kommunikasjon handlar om korleis kommunikasjonen i og utøvinga av servicerolla skal tilpassast ulike servicemottakarar, kollegaer og bransjar innanfor administrasjon, service og sikkerheit. Vidare handlar det om å møte behov på ein profesjonell og sjølvstendig måte og om å utvikle løysingar som dekkjer behova. I dette ligg det å hente inn og omarbeide informasjon og å velje passande verktøy, kanal og form for formidling til ulike målgrupper.

Tverrfaglege tema

Folkehelse og livsmeistring
I vg2 service, sikkerheit og administrasjon handlar det tverrfaglege temaet folkehelse og livsmeistring om å byggje profesjonelle relasjonar i kommunikasjon og samhandling med ulike menneske. I dette ligg det å kunne handsame reaksjonar, setje grenser og respektere andre sine grenser i ulike relasjonar og arbeidssituasjonar. Vidare handlar det om å utvikle kunnskap om rus, forståing for ulike livssituasjonar og respekt for ulike grupper, fellesskap og kulturar i arbeidet. Folkehelse og livsmeistring handlar òg om å sikre god fysisk og psykisk helse i løpet av arbeidsdagen gjennom kunnskap om helse, miljø og sikkerheit.

Demokrati og medborgarskap
I vg2 service, sikkerheit og administrasjon handlar det tverrfaglege temaet demokrati og medborgarskap om å sikre at verdiane og spelereglane i demokratiet blir tatt vare på i sikkerheitsarbeidet og i administrativt arbeid. Gjennom konfliktførebygging, beredskap og risikovurdering av samfunnssikkerheita skal faget bidra inn i det sivile samfunn. Elevane skal gjennom refleksjon og utforsking øve opp evna til å tenke kritisk, lære seg å handtere meiningsbrytingar og respektere ueinigheit. Vidare skal elevane reflektere over ulike maktforhold i møte med andre menneske og korleis utøve yrkesrolla i tråd med demokratiske prinsipp. Demokrati og medborgarskap handlar vidare om å delta aktivt i arbeidslivet og om arbeidsgivaren og arbeidstakaren sine rettar og plikter.

Berekraftig utvikling
I vg2 service, sikkerheit og administrasjon handlar det tverrfaglege temaet berekraftig utvikling om å ta ansvarlege, etiske og miljøbevisste val i formidlinga og utføringa av ulike arbeidsoppgåver. Vidare handlar det om å bruke ressursar effektivt og med vekt på berekraft for å unngå tap av verdiar og belastningar på klima og miljø.

Grunnleggjande ferdigheiter

Munnlege ferdigheiter
Munnlege ferdigheiter i vg2 service, sikkerheit og administrasjon inneber å kunne kommunisere med kollegaer og menneske frå ulike kulturar og i ulike livssituasjonar. Dette inneber å tilpasse sitt eige språk til mottakaren og situasjonen og å lytte til og vise respekt for den som snakkar. Vidare inneber det å kunne bruke relevante faguttrykk og sikre at informasjonen ikkje berre blir gitt, men òg forstått av mottakaren.

Å kunne skrive
Å kunne skrive i vg2 service, sikkerheit og administrasjon inneber å kunne dokumentere, omarbeide og utveksle relevante opplysingar og relevant informasjon. Vidare inneber det å kommunisere skriftleg og profesjonelt med ulike mottakarar og å utarbeide planar, rapportar og dokumentasjon i tråd med gjeldande krav.

Å kunne lese
Å kunne lese i vg2 service, sikkerheit og administrasjon inneber å kunne finne, forstå, tolke og vurdere informasjon. Det inneber òg å kjenne til og bruke relevant fagspråk i yrkesutøvinga og å vere kjeldekritisk.

Å kunne rekne
Å kunne rekne i vg2 service, sikkerheit og administrasjon inneber å kunne hente inn, omarbeide, analysere og vurdere talmateriale og presentere desse i relevante oppsett. Vidare inneber det å kunne lese rekneskapar, bruke budsjett og å utføre økonomiske berekningar.

Digitale ferdigheiter
Digitale ferdigheiter i vg2 service, sikkerheit og administrasjon inneber å kunne hente inn, registrere, lagre og bruke informasjon. Dette inneber å kunne handtere personopplysningar og vurdere etiske spørsmål knytte til personvern og opphavsrett. Vidare handlar digitale ferdigheiter om å vise digital dømmekraft i arbeidet og vurdere kjelder kritisk. Digitale ferdigheiter handlar òg om å kunne bruke digitale verktøy i tråd med den teknologiske utviklinga både i eige og i tverrfagleg arbeid.

Kompetansemål og vurdering

Kompetansemål og vurdering sikkerheit (169 årstimar)
Mål for opplæringen er at eleven skal kunne:
  • gjere greie for arbeidsområda, tenestene og produkta til vaktverksemdsbransjen og vurdere desse med utgangspunkt i sikkerheitsbehova i samfunnet
  • planleggje, gjennomføre, dokumentere og vurdere eit lokalt arrangement med omsyn til sikkerheit
  • utforske helse-, miljø- og sikkerheitsarbeidet i ei verksemd og gjere greie for dei ulike rollene dei tilsette har i dette arbeidet
  • utforske kva sikkerheit og personvern har å seie, og følgje rutinar for sikkerheit og personvern i informasjons- og kommunikasjonsteknologi
  • drøfte ulike trusselbilete for verksemder og for samfunnet
  • gjere greie for ulike former for risikovurdering og utarbeide ein enkel risikoanalyse med forslag til tiltak
  • utforske, forstå og bruke ein beredskapsplan
  • gjere greie for brannteori og planleggje, gjennomføre og evaluere ei brannøving
  • utføre livreddande førstehjelp, ta ansvar for ein skadestad og reflektere over kva eiga framferd har å seie
  • gjere greie for symptom på å vere ruspåverka og drøfte korleis ruspåverknad, kan gå ut over sikkerheita i ulike situasjonar
Undervegsvurderinga skal bidra til å fremje læring og til å utvikle kompetanse. Elevane viser og utviklar kompetanse i programfaget sikkerheit når dei bruker kunnskapar, ferdigheiter og kritisk tenking til å løyse arbeidsoppgåver i programfaget.Læraren skal leggje til rette for elevmedverknad og stimulere til lærelyst gjennom varierte arbeidsoppgåver. Læraren kan gi arbeidsoppgåver som dekkjer fleire av eller alle programfaga. Læraren skal vere i dialog med elevane om utviklinga deira i programfaget sikkerheit. Elevane skal få høve til å uttrykkje kva dei opplever at dei meistrar, og reflektere over eiga fagleg utvikling. Læraren skal gi rettleiing om vidare læring og tilpasse opplæringa slik at elevane kan bruke rettleiinga for å utvikle kompetansen sin i programfaget.

Kompetansemål og vurdering administrasjon og berekraftig drift (168 årstimar)
Mål for opplæringen er at eleven skal kunne:
  • utforske og presentere ei sjølvvald verksemd som vektlegg innovasjon og nyskaping, og drøfte kva dette har å seie i utviklinga av verksemda
  • gjere greie for ulike typar lønn og berekne lønnskostnader
  • forstå og presentere ein enkel rekneskap, setje opp eit likviditets- og resultatbudsjett og kommentere avvik mellom budsjett og rekneskap
  • vurdere inntektsgrunnlaget til ei verksemd og kva faktorar som påverkar lønnsemd og berekraft
  • planleggje, gjennomføre, dokumentere og vurdere eit lokalt arrangement med omsyn til lønnsemd og berekraftig utvikling
  • reflektere over kva faktorar som påverkar arbeidsmiljøet i ei verksemd, og drøfte ulike tiltak som kan betre det
  • gjere greie for ulike administrative rutinar og vurdere tiltak som kan betre rutinane
  • gjere greie for ulike system for å handtere, stille saman og finne att dokument, og bruke eigna verktøy for dette
  • utforske og drøfte korleis verksemder profilerer seg i ulike medium
  • utarbeide innhald til ulike planar, rapportar og dokument og tilpasse innhaldet til ulike mottakarar
  • beskrive ulike typar svinn, reflektere over konsekvensane av svinn og foreslå tiltak for å førebyggje svinn
  • koordinere og hjelpe til i saksbehandling og ulike administrative prosessar
  • drøfte kva krav og forventningar som blir stilte til eit likeverdig og inkluderande yrkesfellesskap, og beskrive kva plikter og rettar arbeidsgivaren og arbeidstakaren har i arbeidslivet
Undervegsvurderinga skal bidra til å fremje læring og til å utvikle kompetanse. Elevane viser og utviklar kompetanse i programfaget administrasjon og berekraftig drift når dei bruker kunnskapar, ferdigheiter og kritisk tenking til å løyse arbeidsoppgåver i programfaget.Læraren skal leggje til rette for elevmedverknad og stimulere til lærelyst gjennom varierte og praksisnære arbeidsoppgåver. Læraren kan gi arbeidsoppgåver som dekkjer fleire av eller alle programfaga. Læraren skal vere i dialog med elevane om utviklinga deira i programfaget administrasjon og berekraftig drift. Elevane skal få høve til å uttrykkje kva dei opplever at dei meistrar, og reflektere over eiga fagleg utvikling. Læraren skal gi rettleiing om vidare læring og tilpasse opplæringa slik at elevane kan bruke rettleiinga for å utvikle kompetansen sin i programfaget.

Kompetansemål og vurdering kommunikasjon og yrkesutøving (140 årstimar)
Mål for opplæringen er at eleven skal kunne:
  • utforske kva yrkesetikk og verksemdskultur har å seie i utvalde bransjar innanfor administrasjon, service og sikkerheit
  • reflektere over forventningar til tilsette i sikkerheits-, administrasjons- og servicestilingar
  • utforske korleis kultur, verdiar og haldningar påverkar kommunikasjon mellom menneske, og reflektere over korleis ein kan ta omsyn til dette i ulike arbeidssituasjonar
  • gjere greie for servicerolla og utforske korleis utøvinga av servicerolla må tilpassast ulike mottakarar i ulike situasjonar, og korleis måten rolla blir utøvd på, kan påverke omdømmet til verksemder
  • møte behov på ein profesjonell og sjølvstendig måte og utvikle løysingar som dekkjer behova
  • reflektere over etiske dilemma som kan oppstå i ein arbeidssituasjon, og foreslå moglege løysingar og førebyggjande tiltak
  • presentere samanhengen mellom ekstern, intern og interaktiv marknadsføring og forstå servicemedarbeidaren si rolle i dette
  • utarbeide og presentere informasjon tilpassa ulike målgrupper og bruke eigna kommunikasjonsverktøy
  • utforske tiltak som kan førebyggje konflikt, og bruke ulike metodar for konflikthandtering
  • utforske og gjere greie for aktuelle lover som regulerer yrkesutøvinga
  • drøfte og forstå korleis verdiane og spelereglane i demokratiet regulerer yrkesutøvinga i sikkerheitsarbeidet og i administrativt arbeid
Undervegsvurderinga skal bidra til å fremje læring og til å utvikle kompetanse. Elevane viser og utviklar kompetanse i programfaget kommunikasjon og yrkesutøving når dei bruker kunnskapar, ferdigheiter og kritisk tenking til å løyse arbeidsoppgåver i programfaget.Læraren skal leggje til rette for elevmedverknad og stimulere til lærelyst gjennom varierte arbeidsoppgåver. Læraren kan gi arbeidsoppgåver som dekkjer fleire av eller alle programfaga. Læraren skal vere i dialog med elevane om utviklinga deira i programfaget kommunikasjon og yrkesutøving. Elevane skal få høve til å uttrykkje kva dei opplever at dei meistrar, og reflektere over eiga fagleg utvikling. Læraren skal gi rettleiing om vidare læring og tilpasse opplæringa slik at elevane kan bruke rettleiinga for å utvikle kompetansen sin i programfaget.

Vurderingsordning

Standpunktvurdering

Eksamen for elever Sikkerheit, administrasjon og berekraftig drift og kommunikasjon og yrkesutøving: Eleven skal opp til ein tverrfagleg praktisk eksamen der dei felles programfaga inngår. Eksamen blir utarbeidd og sensurert lokalt. Eksamen skal ha førebuingsdel.

Eksamen for privatistar Sikkerheit: Privatisten skal opp til ein skriftleg eksamen i programfaget. Eksamen blir utarbeidd og sensurert lokalt. Fylkeskommunen avgjer om privatistar skal få førebuingsdel ved lokalt gitt eksamen. Administrasjon og berekraftig drift: Privatisten skal opp til ein skriftleg eksamen i programfaget. Eksamen blir utarbeidd og sensurert lokalt. Fylkeskommunen avgjer om privatistar skal få førebuingsdel ved lokalt gitt eksamen. Kommunikasjon og yrkesutøving: Privatisten skal opp til ein skriftleg eksamen i programfaget. Eksamen blir utarbeidd og sensurert lokalt. Fylkeskommunen avgjer om privatistar skal få førebuingsdel ved lokalt gitt eksamen. Sikkerheit, administrasjon og berekraftig drift og kommunikasjon og yrkesutøving: Privatisten skal opp til ein tverrfagleg praktisk eksamen i desse felles programfaga. Eksamen blir utarbeidd og sensurert lokalt. Fylkeskommunen avgjer om privatistar skal få førebuingsdel ved lokalt gitt eksamen.

Administrasjon og bærekraftig drift (Vg2)

Timer 168

Trinn Vg2 – Videregående trinn 2

Kommunikasjon og yrkesutøvelse (Vg2)

Timer 140

Trinn Vg2 – Videregående trinn 2

Sikkerhet (Vg2)

Timer 169

Trinn Vg2 – Videregående trinn 2